وفاقی وزیر اطلاعات مریم اورنگزیب نے کہا ہے کہ پولیس عدالتی حکم پر عملدرآمد کرنے کے لیے لاہور میں موجود ہے، عمران خان عورتوں اور بچوں کے مورچے کو استعمال کر رہا ہے۔
مریم اورنگزیب نے اسلام آباد میں پریس کانفرنس کرتے ہوئے کہا کہ عمران خان پاکستان میں خانہ جنگی چاہتا ہے، حکومت کا گرفتاری سے کوئی تعلق نہیں ہے، عدالت نے پولیس کو اریسٹ وارنٹ دیا ہے۔
وفاقی وزیر نے کہا کہ جو اپنے آپ کو بہادر خان کہتا تھا وہ چارپائی کے نیچے چھپ کر بیٹھا ہوا ہے، یہ شخص ایک مجرم ہے، اسے عدالت نے بلایا ہے، پولیس کے پاس کوئی اسلحہ موجود نہیں ہے۔ عمران اپنے نام کے ساتھ خان نہ لگائے، خان تو بہادر ہوتے ہیں، جو ڈر گیا وہ مرگیا، وہ شخص لیڈر نہیں ہوتا جو عورتوں اور بچوں کو ڈھال بنائے۔
مریم اورنگزیب نے کہا کہ اگر خیرات کے پیسے ہاؤسنگ سوسائٹی میں انویسٹ نہیں کیے تو جواب دو، اگر تم ٹیریان کے والد نہیں ہو تو عدالت میں جواب دے دو، جواب دو کہ توشہ خانہ سے گھڑی نہیں لی۔وفاقی وزیر نے کہا کہ عدالت کو کہہ دو کہ میں نے خاتون جج کو دھمکی نہیں دی، اگر آج وارنٹ معطل ہوتے ہیں، ضمانتیں ملتی ہیں تو یہ حق ہر شہری کو ملنا چاہیے۔
