مریم نواز کیخلاف توہین عدالت کی درخواست دائر

لاہور(ڈیلی پاکستان آن لائن)مسلم لیگ ن کی سینئر نائب صدر و چیف آرگنائزر مریم نواز کیخلاف توہین عدالت کی درخواست دائر کردی گئی ۔

درخواست رانا شاہد ایڈووکیٹ کی جانب سے لاہور ہائیکورٹ میں دائر کی گئی، درخواست میں موقف اختیار کیاگیا ہے کہ مریم نواز نے سرگودھا میں ورکر کنونشن میں تقریر کرتے ہوئے ججز پر الزامات لگائے ،مریم نواز نے بغیر ثبوت تقریر میں ججزکو سکینڈلائز کیا۔

درخواست گزار نے مؤقف پیش کیا ہے کہ مریم نواز اپنی جماعت کی سینئر نائب صدر اور چیف آرگنائزر ہیں، انہوں نے سرگودھا میں عدلیہ مخالف بیان بازی کی، اور ان کی تقریر الیکٹرانک میڈیا پر لائیو نشر اور اخبارات میں پرنٹ ہوئی۔

درخواست گزار نے مؤقف اختیار کرتے ہوئے استدعا کی کہ آئین کے تحت اعلی عدلیہ کے ججز کیخلاف بیان بازی نہیں ہوسکتی، عدلیہ مخالف بیان بازی پر مریم نواز کیخلاف توہین عدالت کی کارروائی کی جائے، اور انہیں عدالت طلب کرتے ہوئے قانون کے مطابق کارروائی کی جائے۔