ڈسٹرکٹ اینڈ سیشن کورٹ اسلام آباد نے سابق وفاقی وزیرفواد چودھری کے خلاف سرکاری ملازمین کو اکسانے کے کیس کی سماعت 14 نومبرتک ملتوی کردی۔
فواد چودھری اپنے وکیل فیصل چودھری کے ہمراہ عدالت میں پیش ہوئے تو جج طاہر عباس سِپرا نے فواد چوہدری سے پوچھا کہ کیا حال ہیں چوہدری صاحب؟۔اس پرفواد چودھری نے جواب دیا کہ بس نزلہ زکام کھانسی ہے۔
جج طاہر عباس سِپرا نے جواب دیا کہ اپنا خیال رکھا کریں چودھری صاحب، آپ بڑے لوگوں کو عزیز ہیں، سب کو ہی عزیز ہیں۔اس پرفواد چودھری نے جج کو جواب دیا کہ بس سر کوشش ہے اپنا خیال رکھنے کی، سپریم کورٹ میں فیصلہ آگیا ہے، کیس ختم ہوگیا۔
فواد چودھری نے کہا کہ 13 نومبر کو الیکشن کمیشن میں سماعت مقرر ہے، کیس کی سماعت 14 نومبر تک ملتوی کردیں۔
ڈسٹرکٹ اینڈ سیشن کورٹس اسلام آباد نے فواد چودھری کی استدعا منظور کرتے ہوئے کیس کی مزید سماعت 14 نومبر تک کے لئے ملتوی کردی۔
