رواداری کی فضا قائم کرکے دشمن کے عزائم کو ناکام بنانا ہوگا : بزدار

وزیر اعلیٰ پنجاب عثمان بزدار کی زیر صدارت اتحادبین المسلمین کمیٹی پنجاب کا اجلاس ہوا۔اجلاس میں تمام مکاتب فکر کے علما کرام، مشائخ عظام اور علمی و دینی شخصیات نے شرکت کی۔وزیراعلیٰ نے اجلاس کی صدارت کرتے ہوئے کہا کہ مذہبی ہم آہنگی کے فروغ میں علما ئے کرام کے کردار کو فراموش نہیں کیا جا سکتا۔ کورونا ایس او پیز پر عملدرآمد کے حوالے سے بھی آپ نے اپنی ذمہ داریاں بطریق احسن ادا کی ہیں، حکومت علمائے کرام کی خدمات کی قدر کرتی ہے ۔انہوں نے کہا کہ پاکستان ہم سب کا سانجھا ہے ، اختلافات بھلا کر ایک پلیٹ فارم پر یکجا ہوکر وطن کا قرض اتار سکتے ہیں ،سب کو ایک دوسرے کے مذہبی جذبات کا احترام کرنا چاہئے ۔مذہبی ہم آہنگی، بھائی چارے اور پرامن فضا کو یقینی بنانے کیلئے سب کو مثبت کردار ادا کرنا ہے ۔انہوں نے کہا کہ اخوت و بھائی چارے اور رواداری کی فضا قائم کرکے دشمن کے ناپاک عزائم کو ناکام بنانا ہوگا۔
طاہر اشرفی نے کہا کہ علما ئے کرام سوشل میڈیا پر نفرت انگیز مواد پھیلانے والوں پر کڑی نظر رکھیں ۔ زبیر احمد ظہیر نے کہا کہ حکومت کے ساتھ تعاون کو اپنا قومی فرض سمجھتے ہیں ۔ راغب نعیمی نے کہا کہ گزشتہ محرم الحرام میں حکومت کے بروقت اور موثر اقدامات کے باعث بھائی چارے اور مذہبی ہم آہنگی کی فضا قائم رہی ۔اجلاس کے بعداتفاق رائے سے مشترکہ اعلامیہ جاری کیا گیا۔اعلامیہ میں کہا گیا کہ حکومت پنجاب کی وساطت سے قوم کو یقین دلاتے ہیں کہ محراب و منبر دفاع وطن اور قومی سلامتی کے تقاضوں سے پوری طرح آگاہ ہیں ۔ ہم ضرورت پڑنے پر پوری قوم کے ساتھ سیسہ پلائی دیوار کی طرح متحد و متفق کھڑے ہوں گے ۔
اعلامیہ میں کہاگیا کہ مکاتب فکر کے علما،خطبا اور ذاکرین اپنے خطبات میں میانہ روی اور مثبت رویہ اختیار کریں گے تاکہ فرقہ وارانہ کشیدگی پیدا نہ ہو۔محرم الحرام کے دوران امن و امان کے قیام کیلئے انتظامیہ سے مکمل تعاون کریں گے اور بالخصوص کورونا ایس او پیز پر عملدرآمد کو یقینی بنائیں گے ۔ تمام مکاتب فکر کے علما اس امر پر بھی متفق ہیں کہ کسی مسلمان کی دل آزاری نہ کی جائے جس کیلئے ہم سب \”اپنے مسلک کو چھوڑو نہ اور دوسروں کے مسلک کو چھیڑو نہ\” کی پالیسی پر کاربند رہیں گے ۔ایسی ہر تقریر اور تحریر سے گریز اور اجتناب کریں گے جو کسی بھی مکتبہ فکر کی دل آزاری اور اشتعال انگیزی کا باعث بن سکتی ہو۔وزیراعلیٰ سے تونسہ اور کوہ سلیمان کے عوامی نمائندو ں، عمائدین اور معززین نے ملاقات کی۔عثمان بزدار نے شرکا کا ہر نشست پر جا کر حال احوال دریافت کیا۔
4گھنٹے طویل ملاقات میں عثمان بزدار نے عوامی مسائل سنے ۔ عثمان بزدار نے پسماندہ علاقے کے عوام کے مسائل کے حل کے لئے افسران کو فوری طور پر طلب کیا اور عوامی مسائل کے حل کیلئے ہدایات دیں۔وزیراعلیٰ عثمان بزدار نے کہا کہ ڈیرہ غازی خان سمیت پسماندہ علاقوں کا وکیل اور نمائندہ ہوں ۔ عوام کے مسائل حل کرنے کے لئے آخری حد تک جائیں گے ۔ ڈسٹرکٹ ڈیویلپمنٹ پیکیج کے ذریعے پسماندہ علاقوں کی قسمت بدل دیں گے ۔ عوام کی محرومیوں کو دور کرنے کے لئے دن رات کوشش کر رہے ہیں ۔ انہوں نے کہا کہ عوام کے مسائل حل کرنے کے لئے ہر وقت حاضر ہوں ۔ سینکڑوں میل فاصلہ طے کر کے ملاقات کے لئے آنے پر آپ کا شکریہ ادا کرتا ہوں ۔