رنگت گوری کرنے کیلئے کبھی سرجری نہیں کروائی، کاجول
جب سے خود کو دھوپ سے بچانا شروع کیا، اس سے میرا رنگ کافی صاف ہوگیا
ممبئی (شو بز ڈیسک )بالی ووڈ کی معروف اداکارہ کاجول کا کہنا ہے کہ انہوں نے اپنی جلد کی رنگت کو گورا کرنے کیلیے کوئی سرجری نہیں کروائی، بس خود کو سورج کی روشنی سے بچایا جس سے کافی فرق پڑا۔ یاد رہے کہ بالی ووڈ میں شروع کے دنوں میں انہیں سانولی رنگت والی اور موٹی کہا جاتا تھا اور بہت سے لوگ تو انہیں سارا وقت چشمہ پہننے پر بھی تنقید کا نشانہ بناتے تھے۔بالی ووڈ میں انہیں غیر روایتی اداکارہ بھی کہا جاتا تھا کیونکہ اداکارائوں کے حوالے سے یہ طے تھا کہ وہ گوری رنگت اور دلکش نقوش کی حامل ہوں۔ کاجول کے مطابق انہیں ان باتوں نے بالکل متاثر نہیں کیا۔اپنے ایک حالیہ انٹرویو میں اداکارہ نے کہا کہ انہوں نے خود کو دھوپ سے بچانا شروع کیا، جس سے ان کا رنگ کافی صاف ہوگیا تو بہت سے لوگ ان پر جلد کی رنگت صاف کرانے کے حوالے سے سرجری کا الزام لگانے لگے۔ دو ماہ قبل انہوں نے اپنے انسٹاگرام پر اپنی رنگت گورا کرنے کے حوالے سے ایک پرمزاح پوسٹ شیئر کی اور انکشاف کیا تھا کہ انہوں نے اس کے لیے پورا سال خود کو دھوپ سے بچانے کے علاوہ اپنا چہرہ ڈھانپ کر رکھا۔
