وزیر اعظم عمران خان نے بولی وڈ لیجنڈری اداکار یوسف خان المعروف دلیپ کمار کے انتقال پر گہرے دکھ کا اظہار کرتے ہوئے کہا ہے کہ وہ ان کی نسل کے ورسٹائل و لیجنڈری اداکار تھے۔
دلیپ کمار طویل علالت کے بعد 7 جولائی کی صبح 98 برس کی عمر میں انتقال کر گئے تھے۔
دلیپ کمار کے انتقال پر بھارتی وزیر اعظم و صدر سمیت وہاں کی اہم سیاسی شخصیات نے بھی گہرے دکھ کا اظہار کیا ہے جب کہ پاکستانی سیاسی، اسپورٹس و شوبز شخصیات نے بھی ان کے لیے مغفرت کی دعائیں کیں۔
وزیر اعظم عمران خان نے بھی دیگر سیاسی شخصیات کی طرح دلیپ کمار کے انتقال پر گہرے دکھ کا اظہار کرتے ہوئے اپنی ٹوئٹ میں انہیں لیجنڈری اور ورسٹائل قرار دیا۔
وزیر اعظم نے اپنی ٹوئٹ میں دلیپ کمار کی خدمات کا بھی اعتراف کیا اور بتایا کہ جب وہ کینسر کے مرض کے علاج کے لیے شوکت خانم میموریل ہسپتال بنا رہے تھے تب لیجنڈری اداکار فنڈز جمع کرنے کی مہم میں شریک ہوئے تھے۔
عمران خان نے بتایا کہ دلیپ کمار کی جانب سے فنڈ ریزنگ کی مہم میں لندن اور پاکستان میں منعقد ہونے والی تقریبات میں شرکت کے باعث ہی انہیں شروعاتی 10 فیصد فنڈز ملے اور اس وقت فنڈز حاصل کرنا مشکل تھا۔
وزیر اعظم نے دلیپ کمار کی خدمات کا اعتراف کرتے ہوئے لکھا کہ وہ ان کے کردار کو کبھی بھلا نہیں پائیں گے۔
انہوں نے اپنی دوسری ٹوئٹ میں شہنشاہ جذبات کو اپنے عہد کا لیجنڈری اور ورسٹائل اداکار قرار دیا۔
وزیر اعظم عمران خان کے علاوہ قومی اسمبلی میں قائد حزب اختلاف حمزہ شریف نے بھی لیجنڈری اداکار کے انتقال پر دکھ کا اظہار کرتے ہوئے انہیں شوبز کی دنیا کا درخشاں ستارہ قرار دیا۔
انہوں نے لکھا کہ دلیپ کمار نہ صرف بہترین اداکار تھے بلکہ انہوں نے کئی سماجی و فلاحی منصوبوں میں بھی شرکت داری کی۔
