بابر پاکستان کا بڑا نام ، پورا موقع دینا چاہیے: سلیم ملک
کپتانی ایسی چیز ہے جو ایک دن میں نہیں آتی، وقت لگتا ہے، غلطیوں پرتنقید کی بجائے اصلاح کی جائے فخر کو ریگولر پلیئنگ الیون کا حصہ ہونا چاہیے، قومی ٹیم اچھا کھیل رہی ہے، اللہ کرے ورلڈ کپ جیت جائیں
لاہور(سپورٹس رپورٹر)پاکستان کے سابق ٹیسٹ کرکٹر سلیم ملک نے بابر اعظم کی بطور کپتان حمایت کر دی، نجی ٹی وی سے گفتگو کرتے ہوئے سلیم ملک نے کہا کہ بابر اعظم ابھی نوجوان ہے، کپتانی ایسی چیز ہے جو ایک دن میں نہیں آتی، وقت لگتا ہے۔انہوں نے کہا کہ بابر پاکستان کا بڑا نام ہے انہیں پورا موقع دینا چاہیے، اگر پاکستان کی اچھی ٹیم بنانی ہے تو بابر کو موقع دینا ہوگا۔سلیم ملک کا کہنا ہے کہ اگر بابر کہیں غلطیاں کرتا ہے تو تنقید کی بجائے اس کی اصلاح کی جائے، اس میں کوئی شک نہیں کہ پنڈی کی بیٹنگ وکٹ تھی، مگر پاکستان اچھا کھیلا۔سابق کرکٹر نے کہا کہ فخر زمان نے بہت اچھی اننگز کھیلی، ہمیشہ کہتا ہوں فخر کو ریگولر بنیادوں پر پلیئنگ الیون کا حصہ ہونا چاہیے، ورلڈکپ سے پہلے قومی ٹیم اچھی کرکٹ کھیل رہی ہے، اللہ کرے کہ ہم ورلڈ کپ جیت جائیں،ان کا کہنا ہے کہ نیوزی لینڈ کے خلاف کراچی کے میچز مشکل میچ ہوں گے، کراچی کی پچ پر بڑا اسکور نہیں ہو گا، وہاں پر اسپنرز کا بڑا رول ہو گا۔سلیم ملک نے یہ بھی کہا کہ جس ٹیم کی اسپن بولنگ اچھی ہو گی انہیں ایڈوانٹیج ہو گا، ڈیپارٹمنٹ کرکٹ کی بحالی خوش آئند ہے، کھلاڑیوں کو روزگار ملے گا۔
