وفاقی وزیر خزانہ اسحاق ڈار کا کہنا ہے کہ ان لوگوں کو شرم اآنی چاہئے جو ملک ڈیفالٹ ہونے کی باتیں کررہے ہیں. ایم ڈی آئی ایم ایف نےبھی نہیں کہا کہ پاکستان ڈیفالٹ کرے گا۔
اسلام آباد میں میڈیا سے گفتگو کرتے ہوئے اسحاق ڈار نے کہا کہ یہ بڑا مشکل فیصلہ تھا کہ گزشتہ حکومت کو چلنے دیں اور تباہی ہوجائے یا پھرکوئی فیصلہ لیا جائے، پی ڈی ایم کی تمام جماعتوں نے لبیک کہا تو ہم نے ذمہ داری لے لی، پہلے 1998، پھر 2013 اور آج پھر ملک کو ہماری ضرورت ہے۔
اسحاق ڈار کا کہنا تھا کہ جن لوگوں کو پاکستان کے ڈیفالٹ کی تاریخیں دینے کا شوق ہے ان کو شرم آنی چاہیے، بجائے لوگوں کو امید اور تسلی دینے کے وہ ڈیفالٹ کی تاریخیں دے رہے ہیں، ان کے علاوہ کوئی نہیں کہہ رہا ہےکہ پاکستان ڈیفالٹ کرے گا، ایم ڈی آئی ایم ایف نےبھی نہیں کہا کہ پاکستان ڈیفالٹ کرے گا۔
وزیر خزانہ نے مزید کہا کہ آئندہ ہفتوں میں مزید معاملات کا پتہ لگے گا اور بجٹ بھی پیش ہوگا اس کے بعد لانگ ٹرم کے لیے کچھ اور کام ہونگے، پاکستان میں اب وہ چیزیں ہو ں گی جس کا یہ حقدار ہے ۔
اسحاق ڈار نے کہا کہ ایک روز میں سارے مسائل حل نہیں ہوسکتے، ملکی معیشت مشکل کا شکار ہے لیکن بہتری کی امید ہے، قرض زیادہ ہے لیکن ملک کے پاس قیمتی اثاثے ہیں، اس لیے ناامیدی کی کوئی ضرورت نہیں ہے۔
