لاہور(خبرنگار)پاکستان تحریک انصاف (پی ٹی آئی) کے چیئر مین اور سابق وزیراعظم عمران خان نے کہا ہے کہ اوپر بیٹھے چور نظام کو ٹھیک نہیں ہونے دیتے، انصاف کی حکمرانی پر ہی ملک آگے بڑھے گا، الیکشن جیت کر سب سے پہلے انصاف کا نظام ٹھیک کریں گے، سرمایہ کاروں کو بیرون ملک ملنے والا ماحول دیں گے، حکومت کو چیلنج کرتا ہوں اسٹیبلشمنٹ تمہارے ساتھ کھڑی ہے آؤ الیکشن میں مقابلہ کرو، صرف اپنا NRO اور چوری کا پیسہ بچانے کے لیے یہ جماعتیں ملک میں انتخابات نہیں ہونے دے رہیں اور اسکے لیے آئین کو توڑنے کے لیے بھی تیار ہیں۔پی ٹی آئی کے کارکنوں سے ویڈیو لنک کے ذریعے خطاب کرتے ہوئے انہوں نے کہا کہ 2011 ء میں مینارِ پاکستان لاہور کے جلسہ دیکھ کر الیکٹ ایبل سیاستدانوں نے میری پارٹی میں آنا شروع کیا، نواز شریف آج تک وہاں جلسہ نہیں کر سکے، خیبرپختونخوا کا ریکارڈ ہے وہاں کے لوگ کسی جماعت کو دوسری بار حکومت نہیں بنانے دیتے لیکن ہمیں پھر بھی حکومت ملی۔ 2013 کے الیکشن میں دھاندلی کی گئی، صرف چار حلقے کھولنے کا مطالبہ کیا تھا، چار حلقے کھلے تو دھاندلی ہوئی تھی، ن لیگ اپنے امپائروں کے بغیر میچ نہیں کھیل سکتی، اگر ای وی ایم آ جاتی ہے تو دھاندلی ختم ہو جاتی، دوسال کوشش کرتا رہا ای وی ایم کو لایا جائے، تمام جماعتوں اور ان کے ہینڈلرز نے نہیں آنے دی۔سابق وزیراعظم کا کہنا تھا کہ یہ ہماری حکومت کو سلیکٹڈ کہتے رہے، ان کو چیلنج کرتا ہوں اسٹیبلشمنٹ تمہارے ساتھ کھڑی ہے تو آؤ الیکشن میں مقابلہ کرو، ضمنی الیکشن میں امپائر ساتھ ملا کر بھی ہار گئے، چیلنج کرتا ہوں بھاگو نہیں آؤ الیکشن کے میدان میں، نواز شریف پہلے مشرف دور میں بھاگا تھا، اب عدالت سے سزا ہوئی تو پلیٹ لیٹس اوپر کر کے باہر بھاگ گیا ہے۔
عمران خان نے کہا کہ معاشرے میں انصاف ہونے سے لوگ آزاد ہو جاتے ہیں، انصاف ہو گا تو کوئی طاقتور جرم نہیں کرے گا، برطانیہ میں شہزادوں کو بھی قانون توڑنے پر جرمانہ ہو جاتا ہے، پاکستان کے سسٹم میں کرپٹ لوگ پیسہ بناتے ہیں، مغرب میں چوروں کو این آر او نہیں دیا جاتا بلکہ سزا ملتی ہے۔ پاکستان میں سب سے زیادہ پیسے والے لوگ اسمبلیوں میں بیٹھے ہوئے ہیں، یہاں قانون کی حکمرانی نہیں ہے۔
انہوں نے کہا کہ جنرل (ر) باجوہ نے ان چوروں کو اپنی توسیع کیلئے مسلط کیا، ایک سال میں 9 لاکھ پاکستانی ملک چھوڑ کر جا چکے ہیں، ملکی سرمایہ کار بھی جا رہے ہیں، ملکی خوشحالی کا انحصار صرف انصاف پر ہے، ہمیں انصاف کیلئے قربانیاں دینا پڑیں گی، انہوں نے 1100 ارب کی چوریاں معاف کرا لی ہیں، ان کو ڈر ہے کہیں میں اقتدار میں نہ آجاؤں، یہ چوری بچانے کیلئے چیف جسٹس کے پیچھے پڑے ہیں، چیف جسٹس انصاف کیلئے ڈٹے ہوئے ہیں۔پی ٹی آئی چیئر مین کا کہنا تھا کہ مجھ پر حملہ ہوا لیکن 3 طاقتوروں کیخلاف پرچہ درج نہیں کرا سکا، اپنی حکومت ہونے کے باوجود پنجاب میں پرچہ درج نہیں کرا سکا، طاقتوروں نے پکڑے جانا تھا انویسٹی گیشن کو ہی سبوتاژ کر دیا، اگر مجھے انصاف نہیں مل سکتا تو عام آدمی کو کیسے ملے گا، برطانیہ کی پولیس ناجائز کام کرتے ہوئے ڈرتی ہے، مجھ پر اب تک 145 کیسز درج ہو چکے ہیں، 40 دہشتگردی، 15 کریمنل کیسز درج کیے گئے۔ برطانیہ کا پولیس والا یہ نہیں کہہ سکتا کہ اوپر سے حکم آیا ہے، وہاں پولیس والے کو کتے کو چھڑی مارنے پر چھ ماہ سزا ہوئی، میرے سکیورٹی چیف کو اٹھا کر لے گئے، جو معاشرہ طاقتور کو سزا نہیں دیتا وہ تباہ ہو جاتا ہے۔
انہوں نے کہا کہ ملک میں رول آف لا ہوتا تو اقتدار میں بیٹھنے والے ڈاکو پیسہ چوری نہیں کر سکتے تھے، لندن کے مہنگے فلیٹس ملکی چوری کے پیسوں سے خریدے گئے، یہ مافیا ہے اداروں کو تباہ کرتے ہیں تاکہ کوئی چوری نہ روک سکے، شریف خاندان کا سارا ٹبر باہر بیٹھا ہے، وہ پاکستان صرف پیسے بنانے آتے ہیں، ایسا تو صرف بنانا ری پبلک میں ہوتا ہے۔ ملک کا مستقبل صرف ایک ہے سب کو حقیقی آزادی کی جدوجہد کرنا ہوگی، جب تک ملک میں انصاف نہیں ہوگا خوشحالی، جمہوریت نا ہی آزادی ملے گی، دنیا میں ڈنمارک انصاف دینے میں پہلے نمبر پر ہے، پاکستان کا نمبر 129 واں نمبر ہے، اگر یہ چور اوپر رہ گئے تو پاکستان کا نمبر انصاف دینے میں 140 سے بھی اوپر چلا جائے گا۔سابق وزیراعظم کا کہنا تھا کہ ملک سوائے تحریک انصاف کے کوئی ٹھیک نہیں کر سکتا، ایک کروڑ اوورسیز پاکستانی ہمارا سب سے بڑا اثاثہ ہیں، اوورسیز پاکستانی اگر سرمایہ کاری کریں تو کسی کے آگے ہاتھ پھیلانے کی ضرورت نہیں پڑے گی، اوورسیز پاکستانی، پاکستان سے پیار کرتے ہیں، ان کی سرمایہ کاری کیلئے سہولیات دینا ہوں گی، اگر انصاف ہوگا تو اوورسیز پاکستانی ملک میں انویسٹ کریں گے۔عمران خان نے کہا کہ اوپر بیٹھے چور نظام کو ٹھیک نہیں ہونے دیتے، جب تک ان کو الیکشن میں شکست نہیں دیتے تب تک کوئی تبدیلی نہیں آنے لگی، ملک تب آگے بڑھے گا جب انصاف کی حکمرانی آئے گی، الیکشن جیت کر سب سے پہلے انصاف کا نظام ٹھیک کریں گے، سرمایہ کاروں کو بیرون ملک ملنے والا ماحول دیں گے، میرا ایمان ہے تحریک انصاف کی 28 ویں سالگرہ پر ہماری حکومت ہو گی اور ملک اس دلدل سے نکل گیا ہوگا۔
